التورتاية ساحت
من سنتين كان فرح واحد صاحبي .. وبما انه صاحبى جدا وبعزه وبقدره ف انا قررت اعمله مفاجئه اليوم دا وفضلت كام يوم افكر ياتري ايه المفاجئه اللي ممكن تفرحه هو وعروسته وبالذات عروسته عشان مابتطقنيش اصلا .. اسأل دا واسأل دي وانا مش عارف .. نزلت الشارع قلت اروح محل هدايا اجيبله هديه محترمه ف حدود ال 500 جنيه يلا انشالله ما حد حوش
وانا ماشي لقيت محل حلويات وفيه تورت .. قلت بس انا هجيبله تورتايه خمس ست ادوار ودي تبقي هديتي ليهم .. وفعلا دفعت تمنها واتفقت ع يوم التسليم
وجه معاد الفرح وجت التورتايه واتفقت مع منظمين القاعه انها هتتربط بحبل شيك كده ومتزوقه وتنزل من السقف واحده واحده وحاجه اخر الاجه .. جه وقت المفاجئه بتاعتي مسكت المايك وقولت بااااااس الناس كلها اللي ف القاعه تتجمع ف النص بقي عشان المفاجئه بتاعتي لاجمل عروسين ف الدنيا ويارب يتمم ع خير
لقيت العروسه بتبصلي من فوق لتحت بقرف تحس اني مرات ابوها او ضرة امها .. شلاضيمها طالعه لفوق ورافعه حاجب ومنزله التاني وبتبصلي كأنها بتقولي “مسم كُبه” وانا مدي التنفيض
الناس اتجمعت ف نص القاعه وجبت العروسين جمبي وقلت سقفه للنبي يا جدعان الله ماتحسسونيش اني ف ميتم .. الناس سقفت ومسكت الحبل اللي مفروض بشده عشان التورتايه تنزل بشكل دراماتيكي حلزوني والشمع بيشعلل فوقها .. طب سقفه للنبي يا جدعاان .. الناس متجمعه وبيسقفوا ومنتظرين المفاجئه اللي خلاص الناس عرفت انها تورتايه اربع خمس ادوار بس عاملين نفسهم متفاجئين يعني عشان منظري مايبقاش عره
القاعه ساكته خالص مافيش صوت وانا واقف وماسك المايك تحس اني المندوب السامي البريطاني او امين عام الامم المتحده وماسك الحبل بشده والتورتايه بتنزل بسم الله ما شاء الله ماشيه زي السكينه ف الحلاوه .. سقفه تانيه للنبي يا جدعان والناس تسقف وانا اهييييص .. وانشكح ان المفاجئه بتاعتي عاجبه الناس وبالصدفه بشد الحبل لقيته اتقطع والتورتايه عماله تتهز يمين وشمال حاسب حاسب حاس…
بس يامعلم .. التورتايه تقع فوق راس العروسه تغرقلها الفستان والدنيا هووووس ساكته .. ومره واحده الاقي عاااااا عاااااا يا حيواااااان .. والعروسه ابتدت تصوت ابص عليها وابص ع الناس الاقيهم باصين عليا فيه ايه يا جدعان والله ما قصدي
لقيت ام العروسه قلعت معرفش كان شبشب ولا جزمه ف رجلها ومسكته ب اديها وجايه ناحيتي تجري .. الحمد لله رب العالمين اول ما لمحتها بتوطي تجيب حاجه من الارض عرفت هتعمل ايه وطلعت اجري
ولحد دلوقت معرفش عنهم حاجه ولا ايه اللي حصل بعدين غير انهم لعنوا سلسفين اهلي وحلفوا يقيموا عليا الحد لو روحت زورتهم ..
طب والله انا زعلي كله ع التورتايه يا ولاد التييت يلا مالكوش ف الطيب نصيب .. ثم اصلا عادي العروسه مكانتش طيقاني اصلا
#التورتايه_ساحت
#راحت_مطرح_ماراحت
نزل لو سمحت نفرفش الناس شويه
